विधायक गजेन्द्र यादव के पहल ले शासन ले 40 करोड़ के मंजूरी
दुर्ग। जेल तिराहा ले पुलगांव मिनीमाता चौक तक 4.75 किलोमीटर लम्बा फोरलेन रोड बनाय बर शासन ले 28 करोड़ 57 लाख के मंजूरी मिल गे हवय। एकर संग 12 करोड़ 15 लाख यूटिलिटी शिफ्टिंग बर घलो मंजूर हो गे हवय। ए फोरलेन रोड बनाय बर विष्णुदेव साय सरकार के ए पहिली मंजूरी आय जऊन विधायक गजेन्द्र यादव के पहल ले दुर्ग वासी मन ला मिलत हवय।
विधायक गजेन्द्र यादव के निरंतर कोशिश के परिनाम आय कि दुर्ग के जनता बर ए महत्वाकांक्षी स्वीकृति मिल पाइस। यादव जी कहिन – “सहर मं बढ़त ट्रैफिक दबाव ला नियंत्रित कर आवागमन ला सुरक्षित अउ सुगम बनाना ए परीयोजना के मुख्य उद्देश्य आय।” पीडब्ल्यूडी इंजीनियर मन के मुताबिक राशि जारी होवत ही टेंडर प्रकिया सुरु कर दीही।दुर्ग विधानसभा क्षेत्र मं आवागमन ला बेहतर बनाय बर विधायक गजेन्द्र यादव लगातार काम करत हवंय। वार्ड मन मं भीतरी गली के सीमेंटीकरण के संग प्रमुख रोड के चौड़ीकरण के काम घलो सुरु होवत हवय।
जेल तिराहा ले महाराजा चौक अउ महाराजा चौक ले मिनीमाता चौक पुलगांव तक रोड ला फोरलेन बनाय के योजना तैयार होवत हवय। बीते माह विधायक यादव ह पीडब्ल्यूडी अउ सेतु विभाग के अफसर अउ इंजीनियर संग पुलगांव नाला मं नवा पुल, पोटिया चौक मं ब्रिज निर्माण अउ जेल तिराहा ले मिनीमाता चौक तक के रोड के चौड़ाई अउ ले-आउट के नाप-जोख कर प्रस्ताव भेजे रहिन, जऊन बर शासन ले राशि स्वीकृत कर दीस हवय।
विधायक गजेन्द्र यादव कहिन – “जेल तिराहा ले मिनीमाता चौक पुलगांव तक रोड ला फोरलेन बनाय जाही। जनता के मांग अनुसार प्राथमिकता मं विकास काम होवत हवय। ट्रैफिक दबाव ला नियंत्रित कर आवागमन ला आसान बनाय बर पुलगांव तक यूटिलिटी शिफ्टिंग बर शासन ले राशि स्वीकृत कर दीस हवय। ए बर मं मुख्यमंत्री विष्णुदेव साय अउ जम्मो मंत्री परिषद ला दुर्ग वासी मन के ओर ले धन्यवाद देथों।”
